"محمد القرام"، موهبة فرضت نفسها على الساحة الليبية، فخلال أيام قليلة تمكن "القرام" من حشد الكثير من المتابعين عبر مواقع التواصل الاجتماعي، وذلك بعدما انتشرت فيديوهاته للرسوم المتحركة والمدبلجة باللهجة الليبية، والذي يقوم بأداء أصواته بنفسه رفقة زملائه، "القرام" استغل موهبته في تقليد الأصوات، في إعداد وتنفيذ مقاطع فيديو تحكي عن الأوضاع الليبية وخاصة في ظل انتشار فيروس كورونا المستجد، في خطوة منه لإيصال معلومات حول التوعية بالفيروس بطريقة سهلة ومحببة للكبير والصغير.... وللمزيد من التفاصيل حول من هو "محمد القرام"، وموهبته كان لـ"بوابة إفريقيا الإخبارية"، هذا الحوار والذي نقلناه لكم باللهجة الليبية التي اعتمدها "القرام" في رسومه واعتاد عليها جمهوره لتكون سطور الحوار ملائمة مع نسيج وروح الموهبة التي نسلط الضوء عليها في هذا الحوار..
بداية.. عرفنا بنفسك؟
أنا محمد القرام، من ليبيا (طرابلس) مواليد 1992.
أين تعلمت فن الدوبلاج هل هي مجرد موهبة أم تدربت على ذلك بالدراسة أو من خلال كورسات؟
صراحة هي موهبة اكتشفتها في شهر 11-2019 بالصدفة، كنت نتفرج على رسوم سامبي، جي مشهد يتكلم فيه المدرب تارو، أنا رددت الجملة بعده على طول، فحسيت نفسي جبت الصوت بنسبة 80%.
كيف بدأت فكرة إنتاج الفيديوهات المدبلجة باللهجة الليبية؟ أو من أين جاءتك الفكرة؟
الحق الدبلجه باللهجة الليبية كانت إصرار أصدقائي في الفيس وخارج الفيس، وأيضاً خالي كذلك أصر عليا أنّ نجرب الدبلجة باللهجة الليبية، لأن كان تركيزي باللغة العربية الفصحى فقط، وهم نبهوني أجرب بالليبي...وفعلاً جربت بالليبي وعجبهم ..وزدات بعدها نسبة المتابعين للفيديوهات على مواقع التواصل الاجتماعي فيسبوك وغيرها.
تسليط الضوء على فيروس كورونا.. كان من أبرز الفيديوهات التي نالت إقبال جميع الفئات على الساحة الليبية، هل تم التخطيط للأمر بشكل مرتب.. أم كان محل صدفة؟
لما جي موضوع الكورونا فكرت ندير فيديوات يخص الكورونا.يعني تقدري تقولي موضوع مرتب، فقولت اندير شي ع الكورونا بشكل كوميدي ويكون من الواقع يلي صاير في ليبيا....مثلا زي فيديو "صواريخ الزعتر"...لأن قبل مايخش الفايروس لليبيا ..الليبيين كان يقولو للصينيين في الفيس ..يقولولهم ديرو زعتر تو تتعافو من الفيروس... ف جتني فكرة فيديو صواريخ الزعتر...الفيديو هدا جابلي هلبا متابعين. وبعدها لما الكورونا بدأ ينتشر هلبا في دول العالم ..وليبيا دارت حجر صحي...درت فيديوات تحاكي وضع الليبيين مع الكورونا بشكل كوميدي... ع سبيل المثال فيديو.. -"العرس الليبي في عصر الكورنا" واللي يحكي أن الدولة لغت الأعراس في الصالات بشكل كوميدي.
ولما وصلت الكورونا لليبيا درت فيديو:- "الليبيين والمستشفى المرجعي" يحكي على ردة فعل الليبيين بعد ماسمعو بأول حال فيها الكورونا في ليبيا. بعدين درت فيديوات تحكي على أعراض و طرق وقاية من الكورونا بشكل كوميدي...مثلا من رسوم سبونج بوب بعنوان:-"أعراض وطرق الوقاية من الكورونا بالليبي" وانتشر الفيديو بشكل الكبير في أغلب مواقع تواصل الاجتماعي، والفيديو الثاني كان من رسوم غامبول بعنوان:- "لو تحبو ليبيا اغسلو إيديكم" ومجموعة تانية من الفيديوات...
ماهي الخطوات التي تقوم بها لإخراج هذه الفيديوهات، وما المدة التي تحتاجها لإخراج الفيديو.. بشكل تقريبي؟
الخطوات أول شي نرسم الفكرة في راسي...ونختار نوع الكرتون يلي بناخد منه المشاهد باش نطبق عليه الفكرة، وأصعب شي في موضوع الفيديوات هو لما تبحث على مشاهد ادير عليها الفكرة...لأنك ح تقعد تتفرج على كمية كبيرة من الحلقات باش تاخد منها مشاهد..مرات الفيديو ياخد في وقت تقريبا من 10 الى 12 ساعة طبعا بشكل متقطع..كل مرة نخدم شوية..
ماهي الصعوبات التي تواجهك في تنفيذ فكرتك؟
أصعب شي بحث على المشاهد يلي تبي تتطبق عليها الفكرة...وكتابة النص ..لأنك لما بتكتب نص حركة الشفايف ح تربطك..بمعنى طول الجملة بديرها على بداية ونهاية حركة الشفايف.
"سبونج بوب"، و"عدنان ولينا".. لماذا اخترت هذه الرسوم بشكل خاص؟
لأن عدنان لينا فيها أحداث هلبا.. في تشويق وفيها كوميديا...اما رسوم سبونج بوب؛ لأن صوت سبونج بوب وصوت بسيط قراب من صوتي هلبا، ونزيدك عليها سبونج بوب رسوم محبوبة عند الكبير والصغير...
هل لديك خطة لتطوير هذه الأعمال مستقبليا؟
نعم مستقلا نفكر أني ندير رسوم كرتون خاص بيا، وطبعا مش ح يكون العمل ليا أنا بروحي، أكيد ح يشاركوني فيه شباب..
ما هي الرسالة التي تود إيصالها من هذه الفيديوهات؟
الرسالة الأولى، هي أني عرضت الفيديوات بهدف إظهار موهبتي للناس.. لعل وعسى أحد الشركات الخاصة بالدوبلاج تشوف موهبتي ويعرضو عليا الشغل معاهم، والرسالة التانية نحكي على الواقع بشكل كوميدي، أغلب فيديواتي حكت على معاناة الشعب الليبي زي مثلا (على حال الليبين في الحرب..و على حال النازحين....وعلى وضعهم في وقت الكورونا).